我們，十年 〔 Illustration/Pek＿Text/嘉強 〕
１／２【認真篇】
我們相識十年了
有時我覺得我們之間的愛
如乾涸稀鬆的泥土
好像很久沒有
讓一點甚麼
建立在上面
站得住
如果你和我一樣
漸漸感到患得患失
証明我們開始面對現實
開始老餅
最近我多生了暗瘡
難怪心裡偷笑
十年了
我們
詩人話
孩童是成年人的父親
我話
人生就是青春的記憶
如果十年時間像一塊田
我告訴自己
不要只向記憶灌溉
＊＊＊
２／２【超認真篇】
有一日，有人喺街尾大聲叫停你，地點大概係新口岸巴黎街。
「喂！咪行住！」
「嗌你呀……」
你拎轉頭，見到一個有啲熟面口嘅人問你——
「你係咪……三字頭？定係廿到"炆"呀你？」
突然間呢個人撲埋你身邊，用手掩住個嘴，"烘"埋你耳邊，細細聲同你講——
「喂喂……我哋識咗成十年架喇……」
佢把聲果種神經質，令你不期然諗起一個大學同學，個頭好大嘅……跟住，佢又繼續講——
「果陣時呢……喺果個「天井」度讀Design呢～」
「放Break就你有你踢毽呢～」
「佢又有佢睇Amoeba呢～」
「我又有我去「美少女」度嘆杯“卡濃”呢～呢～咩咩咩呢……」（下刪四萬字）
條友如是者仲係咁勁呢～呢～呢～，你有啲唔耐煩，心諗鄭先唔理呢條友，掂行掂過咪冇咁煩囉……
「呢～咩咩咩呢……」
你真係想時間番翻轉頭……突然…潛意識地你將自己嘅左手手指公同無名指挈開，襯條友唔為意一野㩒落去佢兩邊嘅暈"精"度——
——呵叱！同時大叫——：
「Command-Z…………!!!!」
由於你大學時期開始用Mac機用慣手勢，你超純熟咁手起指落——呵叱！——呵叱！係咁㩒，同時不停大叫：「Command-Z Command-Z——！」
正當你㩒佢暈"精"㩒得好過癮嘅一刻，條大頭友個頭突然爆炸！！
你成個人彈開廿九幾尺，扑咗喺地。
你眼前煙霧彌漫，慢慢起身再睇清楚——啲煙形成咗一堆字：「10---1---D---C——」
Ring—Ring……——電話喺呢個時候響起，你手都震哂咁接聽，傳來一陣冷笑，一把衰衰咁但又好熟悉嘅聲同你講：
「欲知後事如何，就喺二零零七年八月卅一號，星期五晚七點鐘，去噴水池寶石酒家，你就知究竟攪乜春架喇，哈哈，哈哈哈哈哈哈……」
你個心又驚又喜，又喜又驚，一滴冷汗就由你嘅暈"精"，直奔"格勒底"深處，同時打咗個尿震。
（未完待續）
没有评论:
发表评论